Hva ønsker du å formidle med forestillingen?
Vi ynskjer å formidle at kroppen er spennande, rar og gøy! Og at det er positivt å vere nysgjerrig på nye oppdagingar.

Hvorfor bør vi velge å gå på denne forestillingen?  
Nysgjerrigper er ei super framsyning å ta med barn mellom 3-6 år på, for å oppleve noko fargerikt og gøy. Og for å potensielt opne ein samtale om dei gode, nye og rare tinga vi kan oppleve med kroppen. Framsyninga er både ei visuell og taktil oppleving, altså du får oppleve den både med augene og øyrene dine, men også med det du kan kjenne. Her får du både treffe teatermasker, ein figur, mange vakre og behagelege stoff og rare, fine lydar! Denne framsyninga fortel historia si fyrst og fremst gjennom rørsler og ikkje så mange ord. Desse tinga gjer at den kanskje skil seg ut frå andre framsyningar ein har sett før. 

Hva er ditt forhold til Teatret Vårt?  
Eg personleg har vokse opp i Ålesund og sidan eg har elska teater frå eg var liten var det stor stas kvar gong det kom ei ny framsyning til byen! I tillegg kjens det litt som eg har vokse opp på Teatret Vårt; det som før heitte Barneteatret Vårt på Arbeideren. Då Eva Mørkeseth, den første leiaren i Ålesund, starta opp denne avdelinga, fekk eg vere ein av ungdomane som var med og laga såkalla foajéteater før kvar framsyning på Arbeideren. Vi laga eit konsept for foajéen basert på konseptet til framsyninga, slik at publikum var ein del av fiksjonen frå dei kom til teateret. Det var heilt vilt kule og lærerike år, og har verkeleg vore med på å forme meg som teatermenneske.

Sprengt Teater har hatt fleire gode samarbeid med Teatret Vårt gjennom åra. Vi gjennomførte halve forprosjektet til Nysgjerrigper i deira lokaler på Arbeideren, og har også gjestespelt der med vår klovneframsyning Verdens Beste Historie, som fylte salen med både latter og god stemning!

Hva opptar deg for tiden?
For eit enormt spørsmål! Korleis skal eg svare på det med få ord...  Nett no er eg oppteken av å lage teater som kommuniserer fyrst og fremst med noko anna enn ord - til dømes rørsler, tekstilar, lyder, lukter osb. ... Og at barn, uansett alder, skal få teater som er for dei, som er morosamt og relevant. Ei slik framsyning vil eg at Nysgjerrigper skal vere!  Også må eg seie at dei grusomme krigane som foregår og folkemordet i Palestina som vi er vitner til no opptek meg, og eg håpar dei fleste andre og. Samt klimakrisa. Og å forsøke å tru på håpet og at handling nyttar midt oppi alt det makteslause og grusomme. Min generasjon har vekse opp med besteforeldre som har vore tidsvitner til andre verdskrig. Gjennom heile vår skulegang har vi sett tilbake i historia og undra oss: kvifor gjorde ikkje folk meir? Forsto dei ikkje kva som skjedde? Og no er vi her sjølv. Alt dette er det vi som er tidsvitnene til. Kva gjer vi? 

Tilbake til hovedsiden Innkikk