Velkomen til ei magisk stund på Teatret Vårt. No skal vi få møte Tonje Glimmerdal – ei sterk, modig, inspirerande og moderne heltinne. Ho har eit uendeleg pågangsmot og ei ukueleg tru på det som er rett. Hennar reise gjennom livets prøvingar og eventyr utfordrar ikkje berre kreftene i naturen, men også konvensjonane og forventningane som samfunnet har sett for ho.

Tonje kjem frå ein liten dal, der fjella står majestetisk rundt og der naturen både er vakker og krevjande. Ho kjem frå Møre og Romsdal. Dette er hennar landskap, det er her ho verkeleg høyrer heime. Sjølv om historia hennar har slått an i andre delar av landet og utlandet, så tenkjer vi at ho er litt meir vår.

Det er noko spesielt med å få oppleve denne historia på heimebane – å kjenne att dei same fjella, dei same vindane, og dei same menneska som Tonje møter på sin veg. Her, i fjella og dalane, blant dei djupe fjordane og den storslåtte naturen, har vi alltid hatt våre eigne Tonjer.

Kjære Maria Parr, tusen takk for at du har skapt Tonje Glimmerdal. Og takk for at du no deler di kloke, varme og djupt menneskelege forteljing med oss. Du har gitt oss eit univers som er både realistisk og magisk. Vi er stolte av å kunne dele Tonje Glimmerdals eventyr med publikum og gler oss til å presentere den fascinerande historia di på vår måte. 

Når vi har arbeidd med denne framsyninga, har vi kjent på styrken i Tonje og hennar evne til å utfordre både naturkreftene og livets harde røyndom. Men vi har også merka at ho ber på ein indre varme som kan smelte is. Tonje Glimmerdal er ei jente som minner oss på kva som verkeleg betyr noko i våre eigne liv, mellom anna det å setje pris på det gode og vakre som finst rundt oss. Vi ynskjer at denne framsyninga skal vere ei påminning om kva det betyr å vere modig – å stå opp for det ein trur på, vere tru mot seg sjølv og aldri gi opp.

Så, kjære publikum, set dykk godt til rette, lat oss ta dykk med på ei reise til Glimmerdalen. Bli med Tonje på hennar fantastiske ferd gjennom både indre og ytre landskap.

Vi håpar at denne framsyninga skal gje dykk ei kjensle av stoltheit, fellesskap og kanskje til og med minne frå eigne opplevingar i dei same fjordane og fjella der Tonje lever sitt eventyr. Kan hende kan vi finne noko av hennar styrke og mot i oss sjølve.

Velkomen heim til Glimmerdalen!



Kristian Lykkeslet Strømskag
Teatersjef