Draum om hausten

Fosse løftar det kvardagslege til noko stort. Gjennom små møte og få ord opnar han eit rom for dei evige spørsmåla: Kva betyr det å leve? Kva held vi fast ved? Kvar finn vi meininga vi lengtar etter? Han kallar sjølv stykket «eit slags måleri over livet».

Forteljinga startar med at ei kvinne kjem tilbake til heimbyen sin og møter ein mann ved ein gravplass. Dei kjenner kvarandre frå før. Det var noko mellom dei ein gong – noko dei aldri fekk levd ut. Han går frå kona Gry, som han har ein son med, og mannen og kvinna blir saman. Foreldra til mannen kjem til gravplassen for å finne att sonen sin. Mannen bryt med foreldre, kone og barn for å leve ut den nye kjærleiken. Men kan forelskinga og begjæret vare? Eller må kjærleiken døy når han blir utsett for kvardagens gjentakingar?

Minna strøymer på. Gradvis glir tid, rom, liv og død inn i kvarandre, og vi blir dregne inn i ei reise gjennom eit heilt liv: kjærleik, sakn, håp, smerte, alt det som gjer oss til menneske.

Dialogane er poetiske og enkle, men dirrar av det som ikkje blir sagt. Dei skapar gjenkjenning, varme og små glimt av humor. Karakterane leitar etter noko - slik vi alle gjer - og i dei finn vi oss sjølve att.

I Teatret Vårts nye oppsetjing får denne forteljinga ei kraftfull og visuelt slåande form. Regissør Tatu Hämäläinen, som har levert to Heddanominerte produksjonar ved teateret, tek no med seg sin sterke, biletrike stil inn i eitt av Fosses mest poetiske verk. Resultatet blir ei teateroppleving som verkeleg skil seg ut.

Velkomen til ei framsyning som grip tak, som utfordrar, og som blir verande lenge etter at du har gått ut av salen. Dette er ei oppleving du ikkje vil gå glipp av.