Tonje Glimmerdal

Tonje er på mange måtar Norge si Pippi Langstrømpe. Ho er den einaste ungen i Glimmerdalen, og den tøffaste jentungen dalen har sett, der ho herjar nedover fjellsidene på ski.

Alle likar Tonje, bortsett frå den kyniske campingplasseigaren Klara. Ho likar ikkje born i det heile teke og har innført forbod mot born på det ho kallar «Hagen Helsecamping». Bestevennen til Tonje er gamle Gunnvald, ein bisk felespelar på over sytti år. Dei to kjenner kvarandre ut og inn – eller gjer dei eigentleg det? Ein dag då Gunnvald er på sjukehuset med broten fot, forstår Tonje at Gunnvald har ein stor løyndom han ikkje har røpt for bestevennen sin. Brått får Tonje mangt å rydde opp i, og det blir ein kamp for å berge lykka og feletonane for verdas beste bestevenn, godt hjelpt av mottoet: 'Fart og sjølvtillit'.

Tonje er ikkje ei jente som gjev opp lett. Ho veit å ta ting i eigne hender og forvandle det vonde til noko godt. Det er ikkje gjort på ein, to, tre. Ho er snart ti år gamal, og så klok og så smart at ein skulle tru ho var hundre! Vil Tonje klare å ordne opp i alle problema som dukkar opp?

Tonje Glimmerdal på Teatret Vårt er ei forestilling basert på den kjende og godt likte boka, og hadde premiere i november 2024. Kjersti Sandal har skrive ein nær, varm og stemningsrik versjon av den populære forteljinga. Anne Wiig spelar Tonje Glimmerdal med varme, humor og action i denne spektakulære forestillinga. Sindre Klykken har skrive musikken, akkompagnert på fele av Britt Elise Skram, medan scenograf Dagny Drage Kleiva har trylla fram ei leiken og fantasifull verd som vil fenge og fortrylle publikum.

Bli med på eit varmt og actionfylt eventyr i Glimmerdalen!